شہریوں کے خلاف جنگ فوری بند کی جائے: آلٹرنیٹو ویو پوائنٹ
لاہور(جدوجہد رپورٹ)بھارت میں بائیں بازو کی ویب سائٹ آلٹرنیٹو ویوپوائنٹ کی جانب سے جاری بیان میں 21مئی کو چھتیس گڑھ میں ماؤنوازوں کے قتل عام کی شدید مذمت کرتے ہوئے شہریوں کے خلاف جنگ فوری بند کرنے کا مطالبہ کیا گیا ہے۔
بیان میں کہا گیا ہے کہ 21 مئی کو بدھ کے روز چھتیس گڑھ کے ضلع نارائن پور میں ایک ‘اینٹی نیکسل’ آپریشن کے دوران سکیورٹی فورسز نے 27 ماؤ نوازوں کو ہلاک کر دیا۔ ہلاک ہونے والوں میں کالعدم قرار دی گئی کمیونسٹ پارٹی آف انڈیا (ماؤ نواز) کے جنرل سیکریٹری نامبالا کیشوا راؤ، المعروف بسوراجو بھی شامل تھے۔ وزیر اعظم اور وزیر داخلہ نے آپریشن ‘کگار’کی کامیابی پر خوشی اور فخر کا اظہار کیا۔
آلٹرنیٹو ویوپوائنٹ اس ٹارگٹڈ کلنگ کی شدید مذمت کرتا ہے۔ اس کارروائی کے پیچھے اصل مقصد چھتیس گڑھ میں آدیواسی برادریوں کی زمین، پانی اور جنگلات پر قبضہ کرنا معلوم ہوتا ہے۔ اس کارروائی کو اینٹی ماؤ نواز آپریشنز کے پردے میں پیش کیا جا رہا ہے، جو دراصل کارپوریٹ مفادات کو فائدہ پہنچاتے ہیں۔
بھارتی ماؤ نواز تحریک کا آغاز زمین سے بے دخلی کے خلاف ردعمل کے طور پر ہوا تھا، لیکن اب یہ قدرتی وسائل، خاص طور پر جنگلات کے استحصال کے خلاف ایک وسیع تر تحریک بن چکی ہے۔ ریاست نے مزاحمت کو دبانے کے لیے قتل عام کا سہارا لیا ہے، جس کی ایک مثال چھتیس گڑھ کا بستر علاقہ ہے۔
حکومت اپنے شہریوں کی ہلاکتوں کی ذمہ دار ہے، اور وزیر اعظم اور وزیر داخلہ اپنی نگرانی میں ہونے والی ٹارگٹڈ کلنگ پر خوشی محسوس کرتے نظر آتے ہیں۔ ‘آپریشن کگار’کے آغاز سے اب تک، صرف ماؤ نوازوں سے تعلق کے شبہ میں 21 دنوں میں 31 افرادہلاک ہو چکے ہیں، جن میں 15 خواتین شامل ہیں۔ اس کے علاوہ چھتیس گڑھ بھر میں انسانی حقوق کی خلاف ورزیوں کی متعدد رپورٹس موصول ہوئی ہیں۔
یہ تسلیم کرنا ضروری ہے کہ ماؤ ازم ان علاقوں سے منسلک ہے جہاں غربت، استحصال، کارپوریٹ تجاوزات، زمین اور روزگار کا نقصان، اور قبائلی وقار و خودمختاری کے مسائل موجود ہیں۔ یہ معاملہ صرف قانون و نظم کا نہیں بلکہ محرومی اور بے دخلی کے وسیع تر موضوعات کا حامل ہے۔ وزیر داخلہ نے نیکسلائٹس کے خاتمے کے لیے 31 مارچ 2026 کی ڈیڈ لائن مقرر کی ہے۔ یہ محدود اور خودغرض نقطہ نظرتشویش کا باعث ہے، جو یہ فرض کرتا ہے کہ بیگانگی کو صرف بیگانگی کا شکار لوگوں کو ختم کر کے حل کیا جا سکتا ہے۔
اگرچہ ہم ضروری نہیں کہ ماؤ نواز سیاست کی حمایت کرتے ہوں، لیکن آلٹرنیٹو ویو پوائنٹ سی پی آئی (ماؤ نواز) کے اراکین اور قبائلی عوام کے ٹارگٹڈ اور غیر انسانی قتل، نیز ان اقدامات کو ممکن بنانے والے غیر جمہوری آمرانہ طرز عمل کی مذمت کرتا ہے۔ ہم ان اقدامات کے خلاف ہیں جو ریاست اپنے شہریوں کے خلاف ان کے حقوق چھیننے کے لیے کرتی ہے۔ ہم تمام جمہوری لوگوں سے اپیل کرتے ہیں کہ وہ ریاستی جبر اور قتل کے ہر واقعے کے خلاف مزاحمت کریں۔
