نیوجرسی سٹی کونسل انتخابات میں دو سوشلسٹ امیدوار کامیاب
لاہور(جدوجہد رپورٹ)امریکی ریاست نیو جرسی میں ڈیموکریٹک سوشلسٹ امیدوار جوئیل بروکس اور جیک ایفروس نے جرسی سٹی کونسل کے انتخابات میں کامیابی حاصل کر کے نئی تاریخ رقم کر دی ہے۔ یہ گزشتہ ایک صدی میں نیو جرسی میں کسی بھی سوشلسٹ کی پہلی انتخابی فتح ہے، جسے مقامی سیاست میں ایک بڑی پیش رفت قرار دیا جا رہا ہے۔
’ڈیموکریسی ناؤ‘ کے مطابق ان کامیابیوں کا سلسلہ اس وقت مزید نمایاں ہوا جب حال ہی میں ڈیموکریٹک سوشلسٹ زوہرن ممدانی نیویارک سٹی کے آئندہ میئر منتخب ہوئے۔ تجزیہ کاروں کے مطابق یہ فتوحات امریکہ کے شمال مشرقی حصے میں بائیں بازو کی سیاست کے بڑھتے ہوئے اثرورسوخ کی علامت ہیں۔
مبصرین کا کہنا ہے کہ جرسی سٹی میں حالیہ نتائج نہ صرف مقامی پالیسی مباحث پر اثر ڈالیں گے بلکہ مستقبل میں سوشلسٹ پلیٹ فارم رکھنے والے امیدواروں کے لیے ہمت افزا راستہ بھی ہموار کریں گے۔
