ٹوٹی جہاں جہاں پہ کمند
فیض احمد فیض
رہا نہ کچھ بھی زمانے میں جب نظر کو پسند
تری نظر سے کیا رشتہ نظر پیوند
ترے جمال سے ہر صبح پر وضو لازم
ہر ایک شب ترے در پر سجود کی پابند
نہیں رہا حرم دل میں اک صنم باطل
ترے خیال کے لات و منات کی سوگند
مثال زینہ منزل بکار شوق آیا
ہر اک مقام کہ ٹوٹی جہاں جہاں پہ کمند
خزاں تمام ہوئی کس حساب میں لکھیے
بہار گل میں جو پہنچے ہیں شاخ گل کو گزند
دریدہ دل ہے کوئی شہر میں ہماری طرح
کوئی دریدہ دہن شیخ شہر کے مانند
شعار کی جو مدارات قامت جاناں
کیا ہے فیضؔ در دل در فلک سے بلند
