اوسلو(جدوجہد رپورٹ) کونسل آف یورپ نے اپنے سابق سیکرٹری جنرل تھُربیعورن یاگلاند کا سفارتی استثنیٰ ختم کر دیا ہے۔ یہ فیصلہ کونسل آف یورپ کی اس کمیٹی نے متفقہ طور پر کیا ہے جو کونسل کے رکن ممالک کے سفیروں پر مشتمل ہے۔ یہ پہلا موقع ہے کہ یورپی کونسل نے اپنے کسی سابق اعلیٰ رہنما کے استثنیٰ کو ختم کیا ہے۔
خیال رہے کہ تھُربیعورن یاگلاند ناروے کے وزیراعظم بھی رہ چکے ہیں اور نارویجن کریمنل انویسٹی گیشن سروس نے ایپسٹین دستاویزات کے انکشافات کے تناظر میں اُن کے متعلق سنگین بدعنوانی کے الزام کی تحقیقات کا آغاز کیا ہوا ہے۔ یہ استثنیٰ نارویجن پولیس کی درخواست کے بعد ختم ہوا ہے۔ پولیس کا کہنا ہے کہ یہ ضروری ہے کہ یاگلاند کے متعلق جو شبہات سامنے آئے ہیں ان کی کھل کر تحقیقات کی جائیں اور استثنیٰ ختم ہونے کا مطلب ہے کہ وہ تحقیقات کا کام کسی رکاوٹ کے بغیر جاری رکھ سکتے ہیں۔
